Г1исаев Якъуб - Олимпийский чемпионасул к1удияв эмен
Ниж к1иго вац, Г1исаги (Якъубил инсул ц1ар кьурав ) дунги рачун Хасавюрталде гочана нижер эмен Якъуб 30 абилел соназ. Эбелалъул вацаз йиччач1о нижгун цадахъ гьей нижер эбел, капурзабалъе гочуна ругиланги абун. Гьедин нижер эбелги йат1алъун, ниж хьихьизе цадахъ жиндирго гьит1инай яц Салих1атги ячун гочана нижер эмен Якъуб Хасавюрталде. Абизе кола, дой инсол яц Салих1атица хьихьана ниж лъик1 турк1изег1ан. Инсуца к1удияв вац вук1ун Г1иса вачунаан цадахъ жиндего кумекалъе… Салих1ат Хасавюрталдаго россасе ана. Инсуца гьений ячана Мавлиятилан абурай гельбахъай. Гьелъие гьарурал ккола дол дир вацал – Расулги Сайродинги. Гьелъги хьихьана ниж. Гьей нижеде т1аде ячарай ч1ужугон цадахъ ниж гочун ун ч1ун рук1ана Кисловодскалда. Щиб ккарабали ч1ужугун хадусан ват1алъана эмен, ниж к1иявгоги рачун шахтаялде ана х1алт1изе,Роостовалъул мухъ бук1ун батилаха гьеб, 100 тумен бук1ана гьениб моц1ие кьолеб г1арац,гьеб г1емераб г1арац бук1ана доб заманаялъ. Эмен шахтаялда х1алт1улеб мехалъ раг1унаан цояв шахтаялда ч1ванилан, жаниб бук1араб х1уби бегун, къоно т1ад реч1ч1ун, хадусел къоязги рач1ана шахтаялда ч1варал г1адамал щвезарун. Гьедин шахтаялъур авариял ккун,щибаб къойилан абухъе цо-цо, к1и-к1и чи хунрач1ун ругилан раг1унаан …Цо къоялъ эмен Якъуб х1алт1одаса рокъове щун, гьес бицана жинде т1аде цо к1удияб къоно т1ад реч1ч1ун бач1ина бихьарав цо г1урусас жив нахъе ц1анилан, гуребани жив ч1аго хут1улароанин довайилан… Гьедилан инсул къот1и ккана х1алт1одаса нахъе ине балъго (Х1алт1оде кват1арав чицин жанив т1амулеб сог1аб закон бук1ана дол лъеберабилел соназ). Базаралде щун чед, рахь босун кваналел рук1аго, т1аде вач1ана мадугьаласул вас. Гьесда ниж нахъе ина рук1ин лъан гурт1изе, инсуца гьев васасухъе босун капустаялъул бет1ер кьуна, жал къасиялде рокъоре рач1инелде борщ гьабизе эбелалъухъе кьейиланги абун... Гьенисан эменгун ниж ккана бак1-бак1алъе Орджоникидзеялде,Карачаялде, Грозныйалде. Хадусан рач1ун Хасавюрталде щвана ниж. Эмен Мавлиятгун рекъон нахъеги данделъана. Инсуца Хасавюрталдаса Буйнакскалде кира баччулаан чол гьакида лъун, машинаби-жалги рук1унареб мехлъидалха бук1араб. К1удияв вац Г1иса вачунан гьес кумекалъе. Хадуб дун инсул яц Ажиде аск1ове ккана Алмахъалде. Г1исае бокьун гьевги диде аск1ове вач1ана. Хасавюрталдасан эмен ун вуго Казахстаналде, гьенир нилъер кулак гьарун рит1арал хъизибазда аск1ов вук1ун гьенивги х1алт1ун вуго. Кехурсал эмен хун, Кехурсаги, гьесул эбелги балъго Хасавюрталде щвезарун руго инсуца, гьединго Имамирзал Багьавудинги гьесул эбелги балъго щвезарун руго гьес Хасавюрталде. Живгойин абуни рагъде ккун гьенив т1аг1ун вуго (Багьавудиница бицахъе Якъуб Трудовой фронталде ккун гьенив т1аг1ун вуго).Гьединав лебалав,ц1одорав кивего ун бажарулев чи вук1ун вуго гьев Якъуб, жакъа Лондоналда Олимпиадаялда меседил медаль босун чемпионлъун вахъарав Г1исаев Мансурил инсол инсол эмен.
Салих1 Салих1ов