Печать
13
Авг.

Стихи Ш.Шамирзаева

Добавил(а) Administrator on 13 Август 2017.

Оценка пользователей: / 4
ПлохоОтлично 

                  Шарабодин  Шамирзаев,

шагlир, член  Союза  журналистов  РФ,

журнал  «Салатавия-Алмак»

 

              Имам  Шамиль

Имам,  дур гlарабалъ  ракlищ  рекъараб,

Къилбаралде  вуссун,  кьижун  чlанин  мун.

Щай  къаналги рорхун,  тlадеги  вахъун, 

Тlад  вуссунарев  мун  Дагъистаналде.

 

Дур  хивал  лъоларищ  мугlрул  ракьалде,

Дурго  хьолбохъ  чlараб  гьелъул  халкъалде.

Рокъовеги вачlун,  щай  бахъулареб

Рагlа-ракьанде  щун  кибго  цо  свери?

 

Ахlулгохlде  ваха,  Гlашилтlе  решт1а,

Ракlалде  щвезаре  дол рагъул  сонал.     

Гъазаваталъ  рахъун  дора  хваразе

Зияраталъги  ун  гьабе  цо дугlа.

 

Гъуниб  мегlералда  бахъе  цо  свери,

Ссунареб  цlар  тараб  хъаладухъе  щва,

Хунзахъ  бакlги  бихьун,  а  Чачаналъе,

Чармил  ракl  кlетlолеб  букlагогlадин.

 

Салатавиялде  бухье  цо  сапар,

Сангарлъун  букlанин  дуе  гьелъул  халкъ.

Гьениса  рахъарал  наибзабазул

Наслабахъеги  щун гьаре  цlех-рехал.

 

Кивехун  щваниги  кlочонге дуда

Дурго бахlарзазе  бетlер  къулизе,

Къваригlараб къоялъ хьолбохъ рахъинчlел

Хъубал  наслабазе   нагlанаги  кье.

 

Мун  жакъаги нижей  къваригlун  вуго,

Къвакlараб  хвалченгун  цеве  вахъине,

Гъалбацl  хlебтlуларин  къориниб  тlамун,

Тlаде  вахъа,  Шамил,  гlелин  кьижарав.

 

 

 

 

    Гьадигlанго  кибедай 

  гьаб  гlумру  гlедегlараб

 

Гьадигlанго  кибедай 

Гьаб  гlумру  гlедегlараб,

Речlчlараб чlор  киниги,

Боржун  унеб  бугин гьаб.

Мегlер-гlалахалдасан,

Кьурабалъан-парсалъан,

Свердила  букlинчlогон,

Тlаде  щун  батулин  хвел.

Кигlан  данде  чlаниги,

Дару-мах  гьабуниги,

Сундего  гlин  бачlого,

Хьвавуда  бахчунги чlун,

Жибго  бихьун гуртlизе

Нахъасан  тlад речlизе

Хlадургодай  букlунеб?

Лъилго  цlар  цlехечlого,

Сонахъ  балагьичlого,

Заман  тlаде  щварав  чи

Ракьалде вачуна  гьалъ.

Рущбатал  роси  гьечlеб,

Гьарияхъ гlин  балареб,

Гьаб  гурони  бихьанищ

Бекизе  кlолареб  жо

 

 

 

Расул  Хlамзатовасде

 

Расул,  дур  ракl   чlеялъ  тlолабго  гlалам

Гlодоб  чlвазабуна  киса-кибего,

Чlухlилъун  вукlарав  мун  ватlалъидал,

Тlупараб накlкl  лъуна  мугlрул  ракьалда.

 

Дагъистан  къалъизе  чlорал  риччалеб

Бакълъун  вукlана  мун  дурго халкъалъе.

Жеги  бецlал  сардал  гвангъизарулеб

Зодиб  бугеб  моцlлъун  рикlкlунаан  мун.

 

Дунялалда  тlадго  бищун  машгьурал

Шагlиразул  цояв  цо   мун  вукlана.

Улкаялда  кlиго  вукlун  ватани,

Кlиясдаго  гъорлъги  цо  мун  вукlана.

 

Дагъистаналдаса  дагьал  рахъинчlо

Чlухlизе  бегьулел  хъвадарухъаби,

Амма  мун вахараб  борхалъиялде

Вахине  кlолев  чи  жеги вахъинчlо.

 

Цого  дуда  кlвана  дунялалда  тlад

Дагъистаналъул  цlар рагlинабизе,

Цо  мун  тун  батlияв  тlокlав  вахъинчlо

«Хъахlал  къункърабазда»  куркьбал  гъурав  чи.

 

Гьале чанго  соназ,  свак   рагlинчlого,

Роржунел  руго  гьел  къасиги  къадги.

Зодире  балагьун  рихьичlониги,

Рагlуна  кибего  дур  гьезул  гьаракь.

 

Дир  ракlалъ   жегиги  буго  къотlулеб,

Къункърабаз  мун  цадахъ  вачун  ватилин,

Гьелгун  тира-сверун,  кивегоги  щун,

Нахъеги ракьалде  мун  рещтlиневин.

 

Бахlарчиясулги,  поэтасулги,

Сундул  къотlаниги,  цlар  къотlуларо,

Чlаго  рукlаниги,  хун  рукlаниги,

Рехсола  кидаго  гьезул  гьунарал.

 

Мунго  хвананиги,  дуцаги,  Расул,

Хвел  гьечlеб  цlар  тана  гьаб  ракьалда  тlад.

Мун  гъорлъ  гьечlониги,  чанги  кьерилаз

Кьела  гьаб  цуцахъе  цебеса  цебе.

 

 

 

 

 

 

 

Казбек районалъул

85 сон тlубаялъе юбилеялде

Ассаламу гlалайкум,  Казбекалъул халкъ,

Баркула нужеда районалъул къо.

Биччан те жегиги нилъер наслабаз

Нус-нус  сонабаз гьеб кlодо гьабизе.

 

Ункъоялда щуго гьанжесел сонал

Казбек районалъе дагьал ратании,

Салатавиялъул къисмат лъалезе

Лъабго-ункъго цlикlкlарал руго.

 

Гьаб ракьалъул тарих бечедаб буго,

Бицен къотlун гьечlо жакъаги гьелъул,

Нилъер кьерилазул чанго гlасрабаз

Кьела гьеб цуцахъе цебеса цебе.

 

Гьалъул бахlарчияб халкъалъ жегиги

Лъиданиги цебе бетlер къуличlо.

Гlемер чабхъенчагlаз къасд гьабуниги,

Гьеб къуркьизабизе тушман вахъинчlо.

 

Гьаниб чlухlизе жо гlемераб буго,

Гlадамазул лъикlлъи гlунги тlокl буго,

Пандур хъван ахlулеб кечl гьечlониги,

Чlаголъи халкъалъул цlикlкlараб буго.

 

Кьуна ватlаналъе гьалъ бахlарзалги,

Олимпиадаязул чемпионалги,

Рахъана гьаниса гlалимзабиги,

Росгосдумаялъул сенаторалги.

 

Берда бихьичlони чи божулареб

Батlияб тlабигlат Аллагьас кьураб,

Гьаб Дагъистаналъул «Швейцариялъ»

Берцин гьабун буго мугlрузул улка.