ЭБЕЛ, ДУН УНЕВ ВУГИН,
АБЕ НУХ БИТ1АГИЯН
Эбел, ургъел бикьизе
Чиги ватулев гьеч1о,
Чучун ургъел бикьулей
Мунги къанабакь йиго.
Эбел, дуда г1адин дун
Лъиданиги вич1ч1инч1о,
Дуе г1адин рак1 рагьун
Лъиениги чучич1о.
Эбел, гьале жакъаги,
Сапаралдаса щварав,
Дур вас мунгун чучизе
Дур хабаде щун вуго.
Эбел, хабада ч1вараб
Зонода къвалги жемун,
Дун дирго г1узрабазул
Дуе бицунев вуго.
Эбел, дуда дир къисмат
Лъалеб бук1арабани,
Дуца дихъги балагьун
Маг1ил лъарал т1елаан.
Эбел, херлъараб къоялъ
Дун къват1иве ккун вуго,
Къваридал сапаразда
Унеб буго дир г1умру.
Эбел, г1олохъанлъиялъ
Риччарал гъалат1аца,
Гъаримал, рохел дагьал
Кьун руго дие къоял.
Эбел, Дагъистаналда
Кьеч1еб талих1 балагьун,
Дун доб чидар ракьалда
Дудаса рик1к1ад вуго.
Эбел, г1айиб гьабуге
Дун лъедерго вач1унин,
Дун рик1к1ад вук1аниги
К1очараб саг1ат гьеч1ин.
Эбел, дуг1адулъги мун
Цебесеб кьерда йигин,
Кьегийин дуй ахират,
Дунял макьуян ккараб.
Эбел, гьаб ракьул гох1алъ
Жаваб гьабулебани,
Г1емераб жо бугоан
Васасул дуй бицине.
Эбел, бицун пайда щиб,
Данде жаваб щолареб,
Дирго рак1 чучиялъе
Дица бицунеб хабар.
Эбел, бакъанил какий
Заманги щолеб буго,
Дун т1ад вуссунев вугин,
Хирияй, лъик1го йик1а.
Эбел, дун унев вугин,
Абе нух бит1агиян,
Нухда квал-квал гьеч1огон
Кивего вачейилан…
Н.Касуев,
член Союза журналистов
ГЬАЛМАГЪЗАБАЗДЕ
Нужеца гьалмагълъун
дун рик1к1ун тани,
Тела дица г1умру
г1адада инч1ин.
Г1агарал, г1умрудулъ
дида данд ч1варал,
Ч1ух1ун нужер ц1арал
рехсела дица.
Гьайбатай къиматай
гьудул Марижат,
Дихъе квер кьуралъухъ
дуе баркала.
Концертал г1уц1изе,
г1олел куцизе
Сахлъигун талих1гун
тайги мун даим.
Г1акълу т1адег1анай
нижер Париза,
Халкъалъе г1акъилаб
калам хъван кьолей,
Кидаго кабинет
дур рахагеги,
Рохалий берталъе
яхъун гурого.
Культура куцалев
начальник Мухтар -
Мун гъорлъа камураб
данделъиго щай!
Щибаб праздникалде
цеве вахъине
Чалухлъигун къуват
къвак1айги дурги.
Динуч, дур рак1алъул
бац1ц1алъиялда
Дунго бахиллъула,
багьа к1удияб.
Рак1-рак1алъ дица дуй
кьола баркала
Сахаватав г1адан
мун вук1иналъухъ.
Ниязбег Алмахъский -
халкъалъул ч1ух1и,
Рокьула дур куч1дул
даим ц1ализе.
Ц1ия-ц1иял т1ахьал
т1аде рахъизе
Ресгун сахлъигун мун
тайги Аллагьас.
Ц1арал хъвач1ониги,
хъвадарухъаби -
Дир рахъалъ нужее
урхъараб салам.
Ссунареб гъирагун,
ручка тетрадгун
Тайги х1алхьиялда
нуж, хъвадарулел.
Раида
Набиева