Печать
17
Авг.

До Алмака далеко

Добавил(а) Administrator on 17 Август 2020.

Оценка пользователей: / 0
ПлохоОтлично 

Алмахъ рикlкlад буго,

         чу хlалакъ буго …

 

Къали кlутlичlони гьал дир кlутlбуца

Ихтияр кьоларо кечl-бакъаналъе.

Хъахlаб гьумералъул гургинал берал,

Сахго гlатlал  цlурай тlехlай дир гьудул.

 

Алмахъ рикlкlад буго, чу хlалакъ буго,

Гьанже мун ячине дир чара гьечlо.

Эбел-инсул адаб гlодобе рехун,

Нухда чан гьабулей чалухъай гьудул.

 

Лъабкъоялда анцlилъ гlумро барав дун,

Гlолохъанчи гьанже дуе лъвинарев,

Тlолго рас хъахlлъараб гьаб дир магжида

Чlегlераб рас бакки щакаб   жо буго.

 

Къулгlадухъ ццулъарал къоролзабаца

Дуе къор гъун  толеб хасият   буго.

Къулгlадухъ рачlунел гlолилал ясал,

Къоролалъул гlакъло гlадахъ босуге.

 

Рукъалде мугъ рехун къулгlадухъ рахъин

Силъун бихьун бугин къоролзабазда.

Росалгунги кьаллъун къотlнов гьудул кквей

Ирслъун бихьун бугин къоролзабазда.

 

Жидерго курсазда ясал куцизе

Макраби рукlунел къоролзабазухъ.

Къулгlадухъ рачlунел гlолил ясазда

Нужерго гlадалъан гlакъло малъуге.

  

Букlараб замана Сагитхlажилги

Махlо беканиги галадулареб.

Бихьулищ къоролалъ дуда малъулеб

Херав Сагитхlажи къвалакь кквейилан.

 

Хъахlаб дир магжида кверал рахъизе

Кин хиял гьабурай гьалагай дуца.

Херав Сагитхlажихъ гlанса бегьун те,

Гlолилав васасул къвалакье лъугьа.

 

Рукъой лъади йиго гъалал хъахlлъарай,

Гъолда къвалакьго лъикl Сагитхlажие.

Халат къвалакь ккураб лаченги хисун

Чаргъадил бусада рекъон ккеларо.

 

Тlинчlай ясги ячун росолъ вачlани,

Алмахъ росдал хераз гlайиб чlваларищ.

 Къвалакье мунги къан, къотlнов вахъани

Гьаглъун вугин дунан, махал ран тела,

 

Сонал данде ккунин ригьин гьабулеб…

Гохlда бекьани хур ракъдалаб ккола,

Хьонлъода бекьани раччдалаб ккола,

Ритlлада бекьани хур лъикl бачlуна,

 

Къулгlа хьихьун ругел къоролзабазе

Анищазги бекьун хур бачlинаро.

Биллил шурмазухъе ракlал щущаял,

Щварал россал хьихьун хьвадизе лъачlел.

 

Щобда бекьаниги хур бачlунгеял,

Хиялазда рухьун намусго гьечlел,

Чвахул ганчlазукье гарбал ккаял нуж,

Гьаб дир чалмаялъул адаб гьабичlел.

 

Рокьол чlор речlчlарав чlаго толарин,

Чlаго Сагитхlажи виччанте нухда.

Къулгlадухъ гlодор чlа дун вачlинегlан,

Сапаралъ кватlани тlад вуссинаро.

 

 Сагитхажи  Саримирзаев,  Алмак